இலங்கை அரசியலில் அடுத்த வாரம் தீர்க்கமான சில தீர்மானங்களை எடுக்கும் வாரமாக அமையப் போகின்றது. 19 ஆவது திருத்தம் நிறைவேற்றப்படுமா? அல்லது பாராளுமன்றம் கலைக்கப்படுமா ? என்ற கேள்விகள் இலங்கை அரசியலை ஆக்கிரமித்துள்ள நிலையில், முன்னாள் ஜனாதிபதி மஹிந்த ராஜபக் ஷ பிரதமர் வேட்பாளராகி பொதுஜன ஐக்கிய முன்னணியின் கதிரை சின்னத்தில் போட்டியிடுவாரென்றும் அரசியல் வட்டாரங்களிலிருந்து தெரிய வருகின்றது.
இது தொடர்பில் மேலும் தெரிய வருவதாவது,
ஜனாதிபதி ஸ்ரீலங்கா சுதந்திர கட்சியின் வேட்பாளராக ஐக்கிய மக்கள் சுதந்திர முன்னணியில் போட்டியிட வாய்ப்பளிக்கலாம். ஆனால் பிரதமர் வேட்பாளராக போட்டியிட வாய்ப்பளிக்கப்படமாட்டாது என ஜனாதிபதி மைத்திரிபால திட்டவட்டமாக தெரிவித்துள்ள நிலையில், பிரதமர் வேட்பாளராக களமிறங்கும் மஹிந்தவின் விருப்பமும் அவரை ஆதரிக்கும் வாசு, தினேஸ், விமல், கம்மன்பில அணியினரும் சற்று தளர்ந்துள்ள நிலையில் சித்திரை புத்தாண்டு தினத்தை முன்னிட்டு தங்காலையில் மஹிந்தவின் வீட்டுக்கு ஐக்கிய மக்கள் சுதந்திர முன்னணியின் எம்.பி. க்கள் 37 பேர் உட்பட மாகாண சபை உறுப்பினர்கள் என 57 பேர் சென்று விருந்துபசாரத்தில் கலந்து கொண்டுள்ளதோடு இதன்போது மஹிந்தவின் எதிர்கால அரசியல் வியூகங்கள் தொடர்பாக பல தீர்மானங்கள் எடுக்கப்பட்டதாகவும் தெரிய வருகின்றது.
பிரதமராகவும், இரண்டு தடவைகள் நாட்டின் ஜனாதிபதியாகவும் பதவி வகித்த மஹிந்த பொதுத்தேர்தலில் சாதாரண வேட்பாளராக களமிறங்குவதை விரும்பவில்லையென்றும் அதேவேளை சுதந்திர கட்சியின் பிரதமர் வேட்பாளராக போட்டியிட சந்தர்ப்பம் கிடைக்காமல் போனால் தினேஸ் குணவர்த்தனவின் தலைமையிலான மக்கள் ஐக்கிய முன்னணியில் போட்டியிடலாம் என்றும் யோசனை முன்வைக்கப்பட்டதோடு,அத்தோடு ஏ.எஸ்.பி. லியனகேவின் இலங்கை தொழிலாளர் கட்சியை மஹிந்தவுக்கு வழங்க தயாராக லியனகே இருப்பது தொடர்பிலும் ஆராயப்பட்டுள்ளது. ஆனால் இக்கட்சியில் பிரதமர் வேட்பாளராக போட்டியிட்டு வெற்றி பெற முடியாது.
அத்தோடு மஹிந்தவை ஆதரிக்கும் எம்.பி. க்களுக்கும் பொது தேர்தலில் வேட்பு மனு சுதந்திர கட்சியில் நிராகரிக்கப்பட்டால் அவர்களாலும் மேற்கண்ட கட்சிகளில் போட்டியிட்டு வெற்றி பெற முடியாது.
இவ்வாறானதொரு நிலையிலேயே மக்களுக்கு நன்கு பரிச்சயமான பொதுஜன ஐக்கிய முன்னணியின் கதிரை சின்னத்தில் போட்டியிட தீர்மானிக்கப்பட்டுள்ளதாகவும் தெரிய வருகின்றது.
இம் முன்னணியின் பொது செயலாளரான முன்னாள் பிரதமர் டி.எம். ஜயரத்ன பதவி வகிக்கின்ற நிலையில் அதற்கான ஒப்புதலை வழங்க அவர் தயாராக இருப்பதாகவும் தெரிய வருகின்றது.
இவ்வாறானதொரு அரசியல் சூழ்நிலை உருவாகுமானால் மஹிந்த பிரதமர் வேட்பாளராகவும் அவரை ஆதரிப்பவர்களும் பொதுஜன ஐக்கிய முன்னணியின் வேட்பாளராக களமிறங்குவதற்கு தீர்மானிக்கப்பட்டதாகவும் தெரிய வருகின்றது.
இவ்வாறு பொதுஜன ஐக்கிய முன்னணியில் போட்டியிட்டால் 113 இடங்களை பெற்றுக்கொண்டு மஹிந்த பிரதமராக வாய்ப்பிருப்பதாகவும் நம்பப்படுகிறது.
இலங்கை அரசியலில் இன்று கடும் சூறாவளி ஏற்பட்டுள்ளது. எதிர்வரும் 20 ஆம் திகதி 19 ஆவது திருத்தம் பாராளுமன்றத்தில் விவாதிக்கப்பட்டு நிறைவேற்றுவதற்கு அரசு தீர்மானித்துள்ளது.
எதிர்க்கட்சி தேர்தல் முறை மாற்றத்திற்கான 20 ஆவது திருத்தத்தையும் இணைத்து விவாதம் நடத்தப்பட வேண்டுமென வலியுறுத்தப்பட்டுள்ளது.இந்நிலையில் 19 ஆவது திருத்தம் நிறைவேற்றப்படுமா?இல்லையா என்பதும் அரசியலில் ஊசலாடிக்கொண்டிருக்கும் பிரச்சினையாக தலையெடுத்துள்ளது.
எனவே அடுத்த வாரம் இலங்கை அரசியலில் முக்கியமான தீர்மானங்களை எடுக்கும் வாரமாக அமையலாம். 19 நிறைவேற்றப்படுமா ? அல்லது பாராளுமன்றம் கலைக்கப்படுமா?பொதுத்தேர்தலில் மஹிந்தவின் வகிபாகம் என்னவென்பது வெளிவரலாம் என்றும் அரசியல் வட்டாரங்களில் பெரும் எதிர்பார்ப்பாக காணப்படுகின்றது.
Source -Virakesary
