1976 ஆம் ஆண்டு முதலாக விடுதலைப்புலிகளால் ஏற்படுத்தப்பட்ட அழிவுகள், குற்றச்செயல்கள் தொடர்பாக விசாரணை நடத்த வேண்டும். அத்துடன் விடுதலைப்புலிகளுக்கு நேரடியாகவோ, மறைமுகமாகவோ உதவி புரிந்த 424 பேர் தொடர்பிலும் விசாரணை நடத்த வேண்டும் என பொலிஸ்மா அதிபரிடம் முறைப்பாடு ஒன்றை கையளித்ததாக புத்திஜீவிகளின் குரல் அமைப்பு தெரிவித்தது.
கொழும்பில் வியாழக்கிழமை அவ்வமைப்பு நடத்திய செய்தியாளர் மாநாட்டிலேயே அதன் இணைச்செயலாளர் சட்டத்தரணி தினேஷ் தொடம்கொட இவ்வாறு தெரிவித்தார்.
அவர் அங்கு தொடர்ந்து கூறுகையில்,
கடந்த 1976ஆம் ஆண்டு முதல் விடுதலைப்புலிகளால் மேற்கொள்ளப்பட்ட பயங்கரவாத நடவடிக்கைகள், கொலைகள் மற்றும் அழிவுகள் தொடர்பில் விசாரணைகளை மேற்கொள்ள வேண்டும் என பொலிஸ் மா அதிபரிடம் முறைப்பாடொன்றை கையளித்துள்ளோம்.
அதில் விடுதலைப்புலிகளால் மேற்கொள்ளப்பட்ட 18 வகையான அநியாயங்கள் தொடர்பில் குறிப்பிட்டுள்ளோம். குறிப்பாக இலங்கை அரசாங்கத்துக்கு எதிராக யுத்தம் புரிந்தமை, மனிதப்படுகொலை, பொதுமக்களை இலக்குவைத்து மேற்கொள்ளப்பட்ட தாக்குதல்கள், மனித வெடிகுண்டுகளைப் பயன்படுத்தி மேற்கொள்ளப்பட்ட பயங்கரவாத தாக்குதல்கள், சிறுவர்களை இணைத்துக் கொண்டமை, யுத்தக்கைதிகளைக் கொலை செய்தமை மற்றும் கடற்கொள்ளை போன்ற 18க்கு மேற்பட்ட பயங்கரவாத செயற்பாடுகளுக்கு விடுதலைப் புலிகள் பொறுப்புக் கூற வேண்டும்.
அதேபோன்று இலங்கையின் சட்டதிட்டத்திற்கமைய எந்தவொரு குற்றச் செயலுக்கும் உதவிபுரிவதும் ஒத்துழைப்பு வழங்குவதும் சதித்திட்டம் தீட்டுவதும் அநியாயமாகும். ஆகையினால் இது தொடர்பாக சம்பந்தப்பட்டவர்கள் தொடர்பில் பூரண விசாரணை ஒன்றை மேற்கொள்ளுமாறு பொலிஸ் மா அதிபரிடம் முறையிட்டுள்ளோம்.
மேலும் விடுதலைப்புலிகளுடன் தொடர்புடையதாகக் கூறப்படும் 16 அமைப்புகள் மற்றும் 2014 ஆம் ஆண்டு வர்த்தமானியில் பெயர், முகவரியுடன் பிரசுரிக்கப்பட்ட 424பேர் தொடர்பாகவும் விசாரணை நடத்தப்பட வேண்டும் எனவும் பொலிஸ் மா அதிபரிடம் முறையிட்டுள்ளோம்.
அத்துடன் இவர்களில் சிலர் வெளிநாடுகளில் இருந்தால், ஐக்கிய நாடுகள் பாதுகாப்புச்சபையுடன் 2001ஆம் ஆண்டு மேற்கொள்ளப்பட்ட இணக்கப்பாட்டின் அடிப்படையில் அதாவது ஐக்கிய நாடுகளில் அங்கத்துவம் பெற்றுள்ள எந்தவொரு நாடும் பயங்கரவாதம் தொடர்பில் விசாரணை நடத்தும் போது அதற்கு அங்கத்துவ நாடுகள் ஒத்துழைப்பு வழங்க வேண்டும் என்ற இணக்கப்பாட்டின் பிரகாரம் வெளிநாடுகளில் உள்ள விடுதலைப்புலிகளுடன் தொடர்புபட்டவர்கள் சம்பந்தமாக விசாரணை நடத்துவதற்கு அரசாங்கத்துக்கு சர்வதேசத்திடம் தேவையான உதவிகளைப் பெற்றுக் கொள்ளலாம். எனவே சர்வதேசமும் பயங்கரவாதத்துடன் தொடர்புடையவர்கள் என சந்தேகிக்கப்படும் நபர்களை விசாரணைக்காக எங்களிடம் ஒப்படைக்கும் என நாங்கள் நம்புகின்றோம் என்றார்.
