யார் இவர்கள்..?

( மஸாகி )

அப்பாவிகளா..?

அல்லது – அடப்பாவிகளா..?

ஐயோ ஐயோ – என்று

கதறக் கதற சுட்டுத் தள்ளும்

தீவிரவாதம் எப்படி - இஸ்லாமிய அரசாக முடியும்..?

வல்லரசுகள்

விதைப்பது அவர்களையாகட்டும் – ஆனால்,

அறுப்பது எங்களையல்லவா..?

இவர்கள் – ஆயுதம் தரித்து

அநீதிக்காக போராட வந்தவர்களா..?

அல்லது – அநீதியை நிலைநாட்ட வந்தவர்களா..?

இவர்கள் – கருப்புடையணிந்து

இருட்டினைப் போக்க வந்தவர்களா..?

அல்லது – கும்மிருட்டினை திணிக்க வந்தவர்களா..?

அவர்கள் – தகர்ப்பது

ஆலயங்களை அல்ல..

இஸ்லாமிய யுத்த தர்மங்களை..

அவர்கள் – கொல்வது

குழந்தைகளை அல்ல..

குர்ஆனின் ஜீவகாரூண்ய போதனைகளை..

தீவிரவாதம் ஒருபோதும் தீர்வாகாது..

சாந்திமார்க்கம் – இஸ்லாமும்

அதைப் போதிக்காது..

 இஸ்லாம்

அடைக்கலமானவர்களுக்கு

அரண்கொடுக்க வாள் எடுத்ததே தவிர,

அதைப் - பரப்புவதற்காக அல்ல..

இஸ்லாமியர் 

நெஞ்சு நிமிர்த்தி - அநீதிக்கெதிராய்,

போர் புரிந்தார்களே தவிர

போற வாரவனைக் கொன்றுவிட்டு,

பொறம்போக்காய் - செத்துமடியவில்லை..

அவர்கள்

சட்டலைட்டு வைத்து – சாகடித்தால்,

அதை தகர்க்கும் தொழில்நுட்பத்தை உருவாக்கி

வானிலேயே சமாதிகட்டு..

அவர்கள்

உற்பத்தி திறமையை

உள்ளங் கையில் வைத்திருந்தால்,

நீ விரலசைவில் - வியாபார சந்தையை வளைத்து,

வல்லரசுகளை திணறடி...

உன் அழிவால் –

அழிவுகளையே வளர்க்க முடியும்..

ஆனால் – ஆக்கத்தால்,

அவர்களையே வாங்க முடியும்..

இஸ்லாமிய சாம்ராஜ்ஜியத்திடம்

இல்லாதது எது..?

மத்திய கிழக்கு மண்ணில்,

கிடைக்காத பொக்கிஷம் எது..?

நாமெதற்கு அவர்களிடம்

உயிர்பிச்சை கேட்க வேண்டும்..?

அவர்கள்தான் – எம்மிடம்

மடிப்பிச்சை வாங்க வேண்டும்..

எமது

சோம்பேறித் தனத்தால்,

அவர்களை தோண்டவிட்டதால்தான்

எமது சாம்ராஜ்ஜியத்தின்

அடிக்கல்லை தோண்டி தோண்டி

அவர்களின் குடிசைகளுக்கு

அஸ்திவாரம் போடுகின்றார்கள்..

இஸ்லாத்திற்கும்

இந்த கயவர்களுக்கும்

இடையில் முளைத்த – இந்த

முடிச்சவிக்கிகள் யார்..?

இவர்கள் உண்மையானவர்களா..? அல்லது

இவர்களை ஊடகங்கள் பொய்ப்பிக்கின்றனவா..?

முடிச்சவிழும் - முகமூடியும் கிழியும் – ஒருநாள்..

Because,

அவர்கள்

ஏமாற்ற நினைப்பது எம்மையல்ல..

ஏந்திய கையில் – இரத்தம் சொட்டும் – அதிகபட்ச,

அநீதி இழைக்கப்பட்டவர்களின் - இறைவனை..

சூழ்ச்சியாளர்களின் – ஆட்சியாளன்

இந்தமாதிரி விளையாட்டை – எப்பொழுதும்,

வேடிக்கை மட்டும் பார்ப்பதில்லை..