நாட்டில் பல தரப்பினரும் நன்மையடையும் வகையில் மின் கட்டணம் மற்றும் இயந்திரங்களை இயக்க பயன்படுத்தும் எண்ணெயின் (எஞ்சின் ஒயில்) விலை குறைக்கப்படவுள்ளதாக தெரிவிக்கும் மின்வலு சக்தி ராஜாங்க அமைச்சர் பாலித ரங்கே பண்டார மின் இணைப்பு பெற்றுக்கொள்ளும் முறையும் இலகுவாக்கப்பட்டுள்ளதாகவும் தெரிவித்தார்.
கொழும்பு தெமட்டகொடை இலங்கை பெற்றோலிய கூட்டுத்தாபனத்தில் இடம்பெற்ற ஊடகவியலாளர் சந்திப்பின் போதே அவர் மேற்கண்டவாறு தெரிவித்தார்.
அவர் தொடர்ந்தும் உரையாற்றுகையில்;
நூறு நாள் வேலைத் திட்டம் வெற்றிப் பாதையில் பயணித்துக் கொண்டிருக்கிறது. அதற்கிணங்க நாட்டின் பொதுமக்களுக்கு அதிக சலுகைகளை வழங்கும் நோக்கத்தில் மின் கட்டணம் குறைக்கப்படவுள்ளது. அத்துடன் இயந்திர எண்ணெயின் விலையும் விரைவாக குறைப்பதற்கு தேவையான நடவடிக்கை எடுக்கப்படும்.
இதுவரையில் மக்கள் மின் இணைப்புக்களை பெற்றுக் கொள்வதில் இருந்த இப்பிரச்சினைகளுக்கு தீர்வு காணும் வகையில் கட்டணம் செலுத்திய உடன் அளவீட்டு மானி பொருத்தப்பட்டு விரைவில் மின் இணைப்பு வழங்கப்படும். அதன்போது மின் இணைப்பை பெறுவதற்காக தற்போது அறவிடப்படும் பணத்திலும் கணிசமான தொகை குறைக்கப்படும். மார்ச் மாதம் ஆறாம் திகதியே இந்த வேலைத் திட்டமும் கட்டணக் குறைப்பும் அமுலுக்கு வரும்.
மேலும் மின் இணைப்பு பெறாதவர்கள் எதிர்காலத்தில் பெற்றுக் கொள்வதற்காக மின்சார சபையுடன் தொடர்பு கொள்ள வேண்டியது மட்டுமே அவசியம். அதற்காக மின்சார சபையினால் நியமிக்கப்பட்டுள்ள குழு விரைவாக வந்து மின் இணைப்பை பெற்றுக்கொடுக்கும்.
அத்தோடு மின் கட்டண குறைப்பு செய்யப்படும் போது இயந்திர எண்ணெய் (எஞ்சின் ஒயில்) க்காக அறவிடப்படும் கட்டணத்திலும் குறைப்பு செய்யப்படும். இதனால் பொதுமக்கள் போக்குவரத்து மற்றும் கடல் சார் தொழில் செய்பவர்களும் இதனால் நன்மையடைவர் என எதிர்பார்த்துள்ளோம் என்று அவர் மேலும் தெரிவித்தார். கடந்த சில நாட்களுக்கு முன்னர் தனியார் போக்குவரத்து சங்க உரிமையாளர்களின் சங்கத்தின் இயந்திர எண்ணெய் விலை குறைக்கப்பட வேணடும் என கோரிக்கை விடுத்திருந்தமையும் குறிப்பிடத்தக்கதாகும்.
