(எம்.எல்.எம்.அன்ஸார் )
தேர்தல் பிரச்சார இறுதி
நாள் போல
நேற்றைய தினத்தை
வாய்ப்பாகி இருந்தது
வானம்!
*
கூதலாலும் குளிராலும்
சோடிக்கப்பட்டிருந்த
மேடையில்
எதிர்க் கட்சியை சேர்ந்த
பீரங்கிப் பேச்சாளராக
பிரசன்னமாகி இருந்த
மழை -
ஆவேசமாக உரையாற்றிச்
சென்றது!
*
நேற்றுவரை ஆளுங்கட்சி
அமைச்சராக இருந்த
சூரியனால் -
மழையின் காரசாரமான உரைக்கு
மறுப்புரையாற்ற
எந்த சந்தர்ப்பமுமே
கிடைக்கவில்லை!
*
சூரியனின் சண்டியனாக
ஊருக்குள்
கெப்பர் தனம் காட்டித்
திரிந்த
வெயிலின் திருகுதாளங்களை
மழை அம்பலப்படுத்திய போது
திக்கு முக்காடி
வாயடைத்துப்போய் நின்றது
வெயில்!
மரங்கள் கரகோஷம் செய்து
மழையை உற்சாகப் படுத்தின!
*
மழை வீண் பழி சுமத்தி
வரம்பு மீறிப் பேசுவதாக
கோபமடைந்த வீட்டு வாசல்கள்
வானத்தை சந்தித்து முறையிட
முயன்ற போதிலும்
மேகங்களின் சனக்கூட்டம்
நிறைந்திருந்ததால்
அது பலிக்கவில்லை!
*
மழை வரும்போது
வானம் தட்டிக் கொடுத்தனுப்பிய
தைரியத்தில்
எதையும் கணக்கிலெடுக்காமல்
தன் உரையை அட்டகாசமாக
நிகழ்த்தியது!
*
ஆற்றங்கரைப் பக்கத்தில்
ஒலித்த
மழையின் உரை
வெள்ளத்தை தூண்டிவிட்டு
வேடிக்கை பார்ப்பதாக
இருந்ததாகவும்
எழுந்தன கண்டனங்கள்!
*
மழையின் உரை முழுவதையும்
பூமி பதிவுசெய்து வைத்திருக்கிறது.
மழையின் ஆவேச உரைக்கு
எதிராக
இன்றைக்கு
வெயிலை அனுப்பி சூரியன்
என்ன நடவடிக்கை எடுக்கப்
போகிறதோ?
07-01-2016
